劉明日誌

今日返到學校，竟然見到carol一早已經坐在係度。「乜妳今日咁早呀？」「關你咩事！」嘩！晨早流流唔駛咁燥下話。「問下o者，唔駛一早就黑晒面咁下話。」carol冇應我就走左出去。唉，返左學都成個月，佢都仲係咁難相處，好似成村人得罪左佢咁。

「喂，劉明！」阿ray一返到黎就拍我。「點呀。」「我頭先經過教員室，見到校長好似係度鬧緊carol咁噃，唔知同沉日佢食煙單野有冇關呢。」我心諗抵佢死啦，頭先仲咁串。「係咩？抵佢啦，做得出唔怕認。」我心諗果句都講埋「哈，乜你咁黑心呀。」

食完lunch等上堂之際，爭取時間同班莊員傾下點搞d promotion，突然聽到一把好惡死既聲音係我則邊大叫我個名：「劉明！」原來又係carol，我都唔係好想應佢：「又點呀！」拍！冷不防caorl竟然無啦啦一巴打落黎，真係重重既一巴！我當堂成塊面好左。「你好野！同校長報串！」咩報串呀？「咩事呀？我幾時同校長報串呀？」

「沉日得你同阿ray見到我，今朝你一返黎冇耐，校長就知道左件事，咁唔係你仲有邊個哎，你好野！」carol講完之後，個上堂鐘聲就響起。「喂，唔係我喎….」都都未講完，阿ray，dennis，黃忠佢地就猛咁叫我返埋位。「算啦，上堂喇，唔好嘈喇。」我半推半就返左埋位，但仍然一路怒啤住carol，佢當然一樣怒啤我啦。我梗係唔想就咁算。「喂，真係唔關我事喎，我咩都冇講過…」

「good afternoon class…」miss wong係呢個唔適當既時候入左黎，我連解釋既機會都冇！

近日大家為左學生會既事都不違餘力，主席少左去自修室，dennis打少左波，阿ray去少左機舖，Kelly都少左去街。大家都好齊心放學留係學校開會同準備定d宣傳用具，一星期三次，每次粒幾兩粒鐘。今日我地又如常開會喇。

「各位，昨日陳sir發放左競選學生會的Schedule喇，你地一日拎一份。」主席昨日去左同陳sir〈學生會競選負責老師〉同埋啟耀閣〈另一個莊既名稱〉主席開會，商討整個競選流程。

「大家都睇到個Schedule啦，整個宣傳期係由10月3號開始，直到10月31號，當中我地可以掛banner，派傳單等等，而係10月23至27號困個星期，我地可以去每一班洗樓介紹自己個莊，最後係31號就會有一個問全校既問答大會，兩個莊一齊上台講政綱，然後解答同學既問題。跟住11月第一個星期就係投票期，全校學生會去投票站投票，11月15號就會公佈結果！所以黎緊一個月大家要努力喇！」主席好清楚咁解釋左黎緊競選既schedule之後，我地就開始傾政綱喇。

「而家最緊要定左政網先，因為我地全年有咩活動就係吸引同學投我地票既原動力，我地要做到照顧晒每一級別既同學先得。」主席所言甚是。

「我諗一年年搞開果d Christmas party呀，bbq呀、sports activities呀就要繼續搞，睇下從中可以有咩新野加入啦！」我呢個意見可以話係一語中的。

「都係。至於針對唔同級別的話，可以幫中一搞d適應輔導班啦，或者中五、七搞補習講座等等。」阿joe率先發言。

「除左咁學術性既活動之外，籃足排比賽當然唔少得啦。」輪到dennis。

「呢d好standard咋喎，不如搞校花校草選舉，特別d嘛。」咁既建議當然係黎自校花大熱之選kelly啦。「好呀，不過要有泳裝環節喎，哈哈。」黃忠又係度亂講野。

「其實大家既建議都唔錯，不如咁啦，俾ｄ時間大家返去諗清楚，下次開會投票選最好既出黎啦。另外，阿ray，聯絡左影印果邊未？d傳單同banner要整架喇。」「ok，我等陣會再跟。」阿ray係負責宣傳，所以呢段時間佢係最忙，作為佢好朋友，等陣我就要同佢出去旺角傾埋d手尾。

「好，咁今日係咁多先啦。」果會一散，我同阿ray就搭車出旺角喇。

由於d價錢基本上都傾好晒，今次出黎都係睇下d板，所以我地好快就做完要做既野，跟手仲去左許留山飲杯野。

正當我剛剛叫完個黑白撈野，突然間係我眼前，有一個打扮入時既女仔行過。佢身穿熱褲小背心，戴左幾條銀鏈係手，化左個濃妝，睇落都幾靚幾野性。但係當我望真ｄ，嘩，原來係carol！佢同幾個一樣打扮入時既人一齊入左黎，我第一時間叫阿ray睇。「ray，你睇下對面，carol呀！」阿ray抬頭一望，佢都打左個突。「嘩，係喎，化埋妝又真係幾索喎。」我地兩個望左佢冇幾耐，就發現carol都望到我地。

佢用眼神啤一啤我地，就繼續同佢d friends傾計講笑，仲落埋包煙出黎食。唉，我平時都覺得呢個carol怪怪地架啦，原來佢既真性情係咁，俾佢屋企人知道真係心痛死。

「喂阿ray，你知唔知我沉日係校長室問口見到咩呀？」

「你唔講我鬼知你見到乜咩！」係喎…

「我見到校長一巴打落carol度呀！」果日係門口，我見到校長同carol係度爭吵，跟手校長就一巴打落carol度，之後carol就眼濕濕咁奪門而出，佢見到我見到佢之後，就推開我一支箭咁標走左。

阿ray聽到都好驚訝。「下！咁都得？校長就可以打人既咩？」咪係，而家仲邊有體訓呢樣野架，校長大晒咩。本來諗住等carol返黎安慰下佢，但caorl今日請左假冇返學，我諗佢可能受到好大打擊。

今日係我地十個莊員第一次正式開會既日子，我地相約放學後係班房開會，傾下我地個莊叫咩名，同埋度下d宣傳口號呀，諗下有咩好既宣傳方法等等，因為今次參選學生會除左我地之外，6b班都組左隊參選，所以我地今次要俾d心機，唔可以輸俾佢地。

個會一開始，主席阿成就首先發言。「各位，好開心我地可以組隊參選學生會，今日開會既議題主要有三，第一要定我地學生會既會名，第二要諗一d宣傳方法去宣傳我地個會，第三要諗一d宣傳口號。我地首先傾左個名先。」主席不愧為主席，開會都有紋有路。

「主席，聽講個莊名一定要有學校名既其中一個字，即係要有黃啟光是但一個字係我地個會名度，而且個會名唔可以太長或太短，要有三至五字。」

 

 「劉明，解釋得非常清楚。好，大家有咩意見？」黃忠搶先發言。「有呀，好易o者，黃忠學生會。」唉，知佢專講廢話。「黃忠！正經d！」主席用佢既威嚴壓制黃忠。 

「主席，不如叫啟發社，即係我地可以啟發到學生做人既道理。」zoe諗得咁大呀。「好似社區中心名多d喎，不如叫神啟寨！幾型！」哈哈，真係俾阿ray激死。 

「哈哈，搞笑得滯喎，不如叫光宗耀社。」「唔好，叫光明頂。」「黃色場所！」「啟業村，哈！」「光豬兵團，嘻。」大家你一言我一語，愈講愈離題。

 「好喇，咪玩喇，不如叫翔光社，代表我地個會一片光明，展翅飛翔！」我地聽到主席咁好既建議，無不歡呼叫好，Yeah！

「好喇好喇，yeah夠啦，而家都差唔多七點，夜喇，今日唔講住宣傳方法同口號，下次開會再傾啦！」好野，主席真係有大將之風，我地一班莊員亦都陸續撒退。 

當我執好晒d野準備返屋企，行經校長室門口，竟然俾我見到……

估唔到阿成唔止讀書快手，連搵人搞學生會都快手，一早返到班房已見佢搵緊人。

「阿Wing，我見你平時畫公仔咁有心機又畫得咁靚，有冇興趣一齊搞學生會做我地designer呀？」阿Wing聽到阿成咁讚佢，當堂成個人飄飄然。「哈哈，你話點咪點囉。」

如是者我地又再搵多一個人喇，而家只係爭一個Public Relation Secretary，搵邊個好呢？就呢個問題，我地九個莊員係lunch time時開會。

「阿成，而家仲爭一個PR喎，搵邊個好呀，邊個肯做呀？」我諗阿成應該有晒計劃，所以一開口就問佢。

「做PR要有好好既溝通技巧，因為要同出面學校既人開會啦，同出面公司拉關係，咁先可以成功搞到聯校活動，唉…但一時間我都未諗到邊個適合。」正當我地苦惱緊搵邊個之際，突然有人從後殺出。

「喂，乜搞學生會都唔預埋我呀？」我地向住聲源一望，原來係model kelly。「你？你唔駛拍廣告咩？」我地齊聲問佢。

「就係因為我拍過幾個廣告，都識d人架，加埋我又係公認既靚女，做PR咪最適合我囉，係咪？哈哈！」Kelly滿有自信咁講。

雖然佢係大口氣d，都都不無道理既，最後我地終於齊集十個莊員，可以交form參選學生會喇。

 

主席  - 阿成

內務副主席 – 阿珊

外務副主席 – 劉明

宣傳– Ray

康樂 — Dennis

設計 — Wing

市場 – 黃忠

公共關係 — Kelly

學術 – Joe

總務 — Zoe

 

今日早會時，王伯同我地講新一屆學生會選舉又黎，叫我地可以組隊競選。我話都多餘既，搞學生會咁多野做，又要幫學生搞活動，又要幫學校做宣傳，萬七咁多野做，我有時間唔好打下波呀、打下機咁，做隻河邊野鶴，消遙自在。

 

Lunch time時，阿成問我：「劉 明，有冇興趣選學生會？」咩話？阿成都有興趣搞？佢唔駛溫書咩？「搞學生會好浪費時間喎，又要搞活動又要幫學校宣傳，你唔駛讀書咩？你唔想升大學咩？」阿 成話：「就係想升大學先至要搞！我知道大學入學要求除左睇成績之外，課外活動都好重要，所以搞學生會一定會加好多分，之後重可以叫校長寫推薦信，百利而無 一害。」呢個阿成，果然為左升U，真係可以不擇手段。「係呀！阿成話仲可以搞聯校function，好似Christmas Ball咁，同隔離女校聯誼溝通架！」「係呀！阿成話可以搞籃球比賽，俾我地一顯身手！ 」「係呀！阿成仲話可以搞辯論比賽啦，bbq啦，直頭想搞咩都得呀！」估唔到阿成咁快就搵到咁多支持者，連阿ray、Dennis同Zoe都buy佢。

 

係啦，劉明，一齊搞啦！」三人異口同聲說服我。

 

「既然係咁，你地都咁支持，咁咪一齊搞囉，之但係搞學生會要幾多人架？」「10個。」

  

「咁重爭5個喎…」「放心，我地實搵齊人既。」阿成咁又信心，似乎今次事在必行。 

返左學差唔多成個星期，開始對班中既同學認識多左，雖然大家都來自唔同既學校，但日日對足八個鐘，所以好似d肥牛咁，好快熟。最快熟就梗係zoe，一來佢坐係我後面，二來佢又多野講，成日撩我地講野，唔熟就有鬼啦。至於Dennis同andy就好鍾意打波，每日一放學都見佢地留係學校打籃球，我同阿ray梗唔執輸啦，所以我地四個就變左波友喇。阿成係個深受大家歡迎的人，因為佢上堂好留心，又每事問，份人又隨和，叫佢借notes借功課都永冇托手肘，所以大家都爭住同佢熟。黃忠〈真名黎架〉人如其名，一樣咁搞笑，鬼主意多多，成日上堂串d阿sir miss，係個名符其實既喜劇人物。至於班中最索既係kelly，生得一副model既身形〈聽講佢真係做過model〉，返左學幾日就吸引到d師兄師弟既目光，成日黎我地班房裝下裝下咁，我地班d男同學就梗加螞蟻嬲蜜糖啦〈不過我冇架〉。

 成班同學之中，最奇怪既就係carol，成日都唔出聲，黑口黑面咁，好似成村人都得罪左佢咁，問佢野佢又求其應下你，一放lunch就自己走左去，就連最熱情既zoe都唔能夠將呢座冰山劈開，都唔知佢咩構造。聽阿ray講，話呢幾日都見到校長捉住carol係度訓話，睇黎佢留係學校既日子都唔方長lu……