夜晚九點三，九公門外，三個有為青年，等緊一個茂利。
「喂，點搞呀，仲未黎既！」「咪係，九點三喇喎！」「有冇搞錯呀，女就話等，仔都要我等？」我地三個齊聲埋怨緊呢個茂利。
說時遲，那時快，茂利一講即到。「sorry sorry，遲左少少，唔好意思。」
「時間地點又係你約，最遲又係你，係咪玩野先？」遲到既就係死仔Ryan。
「sorry呀，媽咪唔放人嘛，係都要我食埋件碌油先俾我出黎，體諒下我啦。」
「剩係你要食碌油，我夠要食水晶梨，阿Ray夠要食提子，細強都要食布冧啦，又唔見我地遲！」Ray同細強齊聲：「咪就係！」
「碌油要剝皮嘛，咁而家唔遲都遲左啦，你地想點先？」Ryan撒賴。
「你咪話約左出黎先諗去邊既，家陣我地唔諗，你諗！如果我地唔滿意既話，你就要再諗，直到我地滿意為止！」
「好喇好喇，一路行一路諗，好快諗到。」我地都覺得冇理由企係度諗，如是者就入左九公，一路行一路等Ryan諗。
「唔…去新港打機好唔好？」呢d咁既建議，我地有咩理由讚成先得架，所以我地三個係咁啤住佢，無聲反對。
「得喇得喇，唔駛啤得咁行，再諗…唔…去草地個度坐下傾下計？」我地再次狠狠地啤住佢。
「明晒，再諗…唔…去邊好呢……」我地一路行一路等緊Ryan既建議，路上又係見到d一雙一對，或者係男男女女三五知己，邊得好似我地四個傻仔，漫無目的咁四圍行。
正當我地煩惱緊既時候，突然聽到Ryan大叫：「喂，喂，不得了，你地睇下前面！」我地向住Ryan所指既方向望去，嘩！真係不得了！如此漂亮既背影，我又點會認錯呢！that’s MIKI！
我地當然第一時間衝前相認啦：「Miki，咁岩既。」除左Miki之外，Mini同Tracy都係度。「咦！咁岩既！哈！」Miki把聲依然係咁好聽。
「哈哈，係囉，你地去邊呀？」一齊去都好喎…
「冇特別地方去呀，你地呢？」Mini搶答。
「我地都未知呀，等緊Ryan建議囉。」我望住Miki答Mini。
「Ryan冇腦架喎，你地有排等啦。」Mini又向Ryan發炮。
「你就冇腦！劉明，諗到喇，不過要細強幫手…」究竟Ryan想點？
「你…你…你想點呀，Ryan！」細強好似有d驚。
「你咪係學校宿舍住既，你開門俾我地返學校玩！」唔…Ryan呢個建議，真係可圈可點喎。
「又黎？上次個鑊俾老豆鬧到死呀，今次又想黎？咪玩我啦！」細強嘗試阻止我地返學校，但係合我地眾人之力，細強又如何匹敵呢？
「唔駛驚喎，我地小心d咪得囉。Mini你地去唔去呀？驚就唔好免強喇，哈哈！」Ryan又乘機挑戰Mini。
「去咪去，驚你呀！」Mini又點會驚呢，但係Miki…
「喂，Mini，會唔會唔係咁好呀…」「唔駛驚喎，行啦，咪衰俾d男仔睇，Tracy行啦…」如是者，Miki就係半推半就之下同我地一齊返學校喇。
「喂，等陣你地靜靜地由後樓梯上班房，唔好咁嘈，唔好開燈。我等陣上黎搵你地。」細強千叮萬囑我地要靜，唔好俾人發現，真係生人唔生膽。
我地依照細強指示，小心奕奕地返去我地既班房，點著幾枝中秋必備既蠟燭，搵個月餅罐裝住擺係枱度，然後我地幾個就圍個圈坐，我當然乘機坐係Miki隔離。
「我地而家做咩好呀？」Tracy好細聲咁問。
「係囉，做咩好呀？」Miki溫柔地附和。
「唔…不如玩truth or dare哎，驚唔驚先？」Ryan一路講一路望住Mini，明顯係挑戰Mini。「你驚我都未驚啦，但係冇道具喎，點玩先？」
正當我地諗緊點玩之際，細強攞住d薯片同汽水入黎。「喂，我偷偷地攞左d汽水薯片入黎，你地玩緊咩呀？」阿Ray見到d枝裝汽水，第一時間攞左一枝，一口氣飲晒，然後就話：「有道具喇喎！」
結果呢個遊戲就由Mini開始，只佢轉一轉個汽水樽，最後樽口停左係阿Ray度。
「哈哈，阿Ray…truth or dare?」「dare，放馬過來！」阿Ray不嬲都唔鍾意講心事，我都估佢會揀dare。
「好，揀個好朋友出黎，嘴對嘴錫佢一啖！」「唔係下話，咁咪即係玩埋我地？」咪係，Ryan講得啱呀，我未嘴過架！
話口未完，只見阿Ray一個箭步走到我面前，二話不說就嘴過黎，oh my god！我都來不及反應，就將我個初吻獻左俾阿Ray！
「哇哈哈！好野好野，果然有種！」Mini笑到見牙唔見眼，Miki同Tracy都掩住嘴係度笑。
「好，到我！」阿Ray發難，一轉個汽水樽，樽口就停係Mini到。
「好，今次輪到你喇！truth or dare！」「驚你咩！dare！」「好，搵個男仔嘴佢一啖！」
唔係下話，阿Ray玩咁大，如果佢搵我點算喎，俾Miki見到……唔…唔…
「哇！Mini好大膽呀，真係錫左劉明一啖呀！」Tracy睇到目瞪口呆，Miki更加睇到唔知點反應…而我…直頭成個傻左…
「好野喎Mini，果然女中豪傑！」Ryan都忍唔住要寫個服字俾Mini。
「唔好講咁多，再黎……啊！今次係劉明！俾個機會你報仇喇，劉明，truth or dare？」我俾人連奪兩吻，都未定過神，點解又再係我？為免又要錫人，我決定揀truth！
「揀truth…好，咁請你講出你鍾意既人個名！嘩哈哈！」嘩！truth仲大鑊過dare！點算好？如果我亂講一個名出來，Miki聽到當真咪大件事！但係如果我講Miki，咁又唔知佢點諗喎…如果佢唔鍾意我咁我點算？我冇諗過係呢度表白喎…
「喂…劉明！快d講！」Mini得勢不饒人，可惡！而Miki又好似好期待咁望住我咁。
冇計，死就死，唯有照直講係Miki，博一博！「呀…佢係…
「喂，邊個吹熄晒d蠟燭？」突然間聽到Ryan驚叫，同時班房內變得漆黑一片，唔知發生左D咩事。「我聽到腳步聲呀，我老豆巡樓呀！唔好出聲呀。」細強細細聲咁同我地講。
突然間成間班房漆黑一片，大家都唔出聲，令到四周圍都好靜，靜到連其他人既呼吸聲都聽到…我坐係Miki隔離，不單止感覺到佢既呼吸聲，直頭聞到佢既氣味，我成個人都陷人一片混亂之中。係濛瀧間，我感到有人捉住我隻手，我直覺覺得係Miki，係佢…好柔軟好舒服…我忍唔住，終於講出最後答案：「係李詠兒！」
(0)
